الحياة حلوة بس نفهمهـــا
* يا ساري النجمِ بلغْ غوطةَ الشامِ .* حبي وصادق أشواقي وتهيامي * *وامسحْ جبينك من أطيابِ واحتها *وانقلْ شذاها لهذا الواله الظامي* * هي الشآم فلولاها لما انطلقتْ * من الضمير أناشيدي وأنغامي
.
.

شو ما طبخت العمشا ....... جوزاااااااااا بتعشّا مقال رقم ( 9 ) يم يم يم

شو ما طبخت العمشا جوزاااااااااااا
 
بيتعشّا .......
 
مقال رقم ( 9 )

 

بنرجع متل ما وعدتكن وحدة عن الحكي المدبّئ ووحدة عن اليم يم يم ولح نحكي هلأ عن بعض الطبخات الشام الدسمة ... الطبخات يلي بيحبّوها الإدما ..

 

والسوّاح وبيجو مخصوص عل الميدان لياكلوها ..

 

أو بيجو على المطاعم الشرقية .. ليدوؤوّا ...

 

متل الشاميات .. وأيام زمان ..

والقرية ... وليالينا ..... إلخ

 

وأكترهن بيكونوا بالإيميرية ..

 

على ما أعتقد ..

 

بس من جهتي أنا مالي صحبة مع ولا وحدة منهن ..

 

لأنو هي اختصاص الأبضايات .. مو الحريمات ..

 

مع العلم طبخن بيطلع من تحت ديّاتن ..

 

بس من جهة الأكل .. لا تخافو رجالنا بيبيضوا الوش ..

وفيكن تطبعوا هل المقال وتاخدوا معكن على أي مطعم من مطاعمنا الشرقية ليكون متل المنيو تبعهن لأنو لح يساعدكن باختيار الأكلات يلي بتحبوها ...

وبإمكان ستات البيوت إنّو يطبعوا كمانة شنّو لأنها بتذكرهن شو يساوو للبعل تبعهن ههههههههه

 

حاكم أحياناً الواحد بينسى وبيحتار شو يساوي ..

 

هيك ما بقا للسّتات حيلة هههههههههه

 

و لح تدعولي أكيد ....

 

بنبدا ... مع

 

قسم الأكلات الدسمة ويلي ما بتااااااكلوا معي بنوووووووووووووب ...

 

 

فتة مقادم : نوع من الفتات بأيادي الغنم مع اللبن والسمن والصنوبر

 

فتة روس : من الخبز المقطع ويسقى بمرقة رأس الخروف المسلوق وعلى الوجه قطع من رأس الخروف ثم اللبن والطحينة والسمن والصنوبر .

 

باسمشكات :شرحات اللحمة تحشى باللحم والصنوبر المقلي وتخيط على شكل

 

 

سلطة لسانات، كمان مثل سلطة البطاطا

 

 

فتة لحمة بخل.. هي أكلة بتنعمل بالمناسبات الكبيرة واللوازم، مثل فتة الداوود باشا بس الحمض فيها خل.

بالإضافة للنخاعات .. واللسانات .. والأبوات ..

لك كل شي بالخاروف ولقولوا تصريفة ..

 

ما بيكبّوا شي ... ما شالله عليهن ..

 

 

قسم الطبخ البيتوتي الشامي العريق وشي بيشهّي وطيّب ويم يم يم

 

يــــبرق : ورق العنب المحشو بالرز واللحمة

 

كـــبـــة مبرومة :عجينة الكبة العادية تحشى باللحمة والصنوبر وتلف اسطوانيا ثم
تشكل كدائرة واحدة في الصينية وتخبز بالفرن


الكبة المشوية :الكبة المشوية الشامية عبارة عن عجينة الكبة وتحشى بخليط الدهن والشحم الناعمين مع الجوز المدقوق والبصل والفليفلة الحرة وتشوى على الفحم.. دسمة كتييييييييييير وفيها كالوري بس طيبة يم يم

 

 ومتل ستي ما حدا بيعرف يساويها بنوووووب


الكبة المقلية :تشكل أقراص الكبة من عجينة الكبة وتحشى باللحم والبصل المقلي مع الجوز والصنوبر وقد يضاف اللوز والفستق الحلبي وتقلى بالزيت .

 

أسهل .. وأسرع وأخف سئلة على المعدة ..

هيك بئولوا ..


كبة بالصينية : تمد عجينة الكبة في الصينية وتوضع فوقها نفس حشوة الكبة المقلية وتوضع طبقة من عجينة الكبة فوق الحشوة وتمد ثم تقطع بالأشكال المطلوبة
وتخبز بالفرن ..

وهَي أسهل الكل .. لا تكبب ولا تدّور .. مد بهل الصينية وبس ..

 


كـــبـــة حـــمـــيص :من عجينة الكبة العادية تصنع كرات صغيرة محشوة باللحم والصنوبر المقلي وتوضع في صلصة بندورة وبصل جوانح ودبس الرمان ويتم طهيهم
معا ...

 

كبة لبنية : أقراص كبة تطهى مع اللبن ويضاف إليها ورق الطرخون .

 

واو شو طيبة ولذيذة ......... بتجنن وبحبها باردة بعكس الخلئ ..

 


باشا وعساكره : كبة لبنية يضاف إليها عجينة الشيشبرك المحشية

 

كمانة طيبة كتيييييييييييييييييييير نصيحة تجربوّا ..

 

 

 

الشاكرية.. قطع لحمة كبيرة مسلوقة ومسقطة بلبن مع  نشاء ومرقة لحمة، بتتقدم مع الرز وفي ناس بتحب معها اللحمة.

 

عموماً كل طبخات اللبن رائعة وطيبة .. وأشطر من ساواها الشوام ..

 

 

فتة الزيت : فتة حمص مسلوق مع فقسة الزيت الذي يضاف إليه الإلي
فيتحول لون الزيت إلى أبيض حليبي المنظر وذو نكهه رائعة وأخصّيتن مع الكمون يم يم

 

وأكترها بيكون يوم الجمعة والعيلة مجتمعة على سفرة وحدة

وبنزلوا بالصينية يا سعدا يا بعدا ........ ههههههههه

 


فتة السمنة : فتة حمص مع شوية طحينة و ليمون وعلى الوش السمن العربي الأصلي والصنوبر

 

كمانة يوم الجمعة بتتاكل ... على الفطور

 

طيبة من عند الشاميات ومطاعم طريق المطار ..

 

ومن عند الجناني كمانة طيبة


فتة مكدوس : من الأكلات الشامية اللذيذة وهنا يوضع الباذنجان مع اللبن والطحينة وتحتهم الخبز المقلي المحمّر ..

 

بتعئّد ........... راااااااااااااااااااااائعة

 

لا تدع الفرصة تفوتك ..

بادر لتذوقها الآن ...

 

العرض محدود ...

كلها الآن ..

 

الشــــاورمـــا : من الأكلات الشامية العريقة لاقت انتشارا في كل الدول العربية وحتى الأجنبية وهي عبارة عن شرائح اللحم مع القليل من شرائح الدهن وتنقع في
خليط من البهارات والخل ثم تشوى على سيخ الشاورما لتحضير السندويشات مع البقدونس والبصل المفروم وقد يضاف إليها الطحينة بالحامض ..

ودوقوّها من عند الأغر مثلاً أو أبو رمانة ..

 

يم يم

 

فخدة ببطاطا، لحمة قطع كبيرة أو موزات مقلية وبعدها مسلوقة وبتنقلى البطاطا مكعبات وبتنحط بالمرقة الصفراء من العصفر.. بتتقدم مع رز وسلطة

 

 

 وعلى قولة المجدرة أكلة مقدرة


مجدرة : عدس مطهو بالزيت مع البرغل وتزين بالبصل المقلي ... وهي أكل الجيش هههههه آل لأنها بسمير الركب ... دوقوّها مع السلطة ومخلل لفت ....



حراء أصبعو : مزيج من العدس المسلوق والمعكرونة ودبس الرمان ويزين باردا بقطع الخبز المقلي وهناك من (يبطنه بالقرنبيط المقلي ) ويستبدل المعكرونة
بالعجبن المقطع

 

مألى الفول : الفول الأخضر المطهو بالزيت مع الكزبرة والتوم

 

كباب هندي : لحمة مفرومة ناعمة مع الصنوبر على شكل أصابع ترص فوق البندورة والبصل وتخبز بالفرن ...وهَي أكلة محترمة ..

 

جداً ومحبوبة من معظم رجااااااالات الشام

 

لحمة كباب :لحمة مفرومة ناعمة مع البصل والبقدونس تشوى بالأسياخ على الفحم ...

 

ولحالها ما بتزبط لازم يكون ناحا لحمة مشوية وبصل مشوي وبندورة مشوية وبقدونس وبصل وصحن صلطة .. مممممممممم يم يم

 

وبتتسمّى مشااااااااوي .. كلّها أشّة لفّة


لحمة بالصحن : لحمة مفرومة ناعمة مع البصل تمد في صينية وتزين بالبندورة وتخبز بالفرن ...ومنها يخبز مع الطحينة والحامض أو رب البندورة

...
 

لحمة بالصحن.. لحمة ناعمة مع بصل مطحونة وأنا بعمل معها صلصة طحينة ودبس رمان

 
صفيحة : بلبن أو ببندورة... ومن المعجنات أيضاً الفطاير بجبنة وبسبانخ

 


 لحمة مكمورة.. لحمة وبصل كتير مكمورة بعرقها لتستوي. طيبة بس تقيلة

 


دجاج محشي.. الحشو من اللحم المقلي مع الصنوبر وشوية رز، بتتخيط الدجاجة بعد حشوها وبتنقلى وبعدها بتنطبخ مثل الفخذة..

 

من المحاشي محشي الملفوف، وبالشام بنسميه  يخنا، حشوة المحشي العادية مضاف إليها المحلب ويضاف النعنع والثوم وحمض التمر هندي إليها.


من أكلات الزيت :  فاصولية بزيت، لوبية بزيت، خبيزة، سبانخ، والمتبل بباذنجان ومتبل الكوسا


الكشكة بزيت.. وهي نوعين: خضرا ويابسة
 وتطبخ في الشتاء مثل الحساء بالزيت مع الكثير من البصل والنعنع والثوم وتصنع منها فتة
والكشكة الخضراء تصنع مع البصل والجوز والبقدونس والزيت وتزين بالبندورة الناعمة

 


فريــــكـــه : هيّي فريكة نوع من الحبوب معها
اللحم والفول الأخضر أو حبات البازيلاء ويغطى الوجه بالقلوبات المقلية يعني اللوز والنوبر والفستق اللحلبي وقد يضاف
الرز المطهو إلى وجه الفريكة .

 
مئلوبة : رز مطهو مع الباذنجان المقلي وتغطى بالقلوبات المقلية ... كمانة .



مفَرًكة بطاطا :بصل مفروم يقلى مع اللحمة وتضافي إليه البطاطا المقطعة ...

 

وهَي أسهل شي اخترعو .. معظم النسوان بتتحيّل فيّا وقت ما بيكون عندا وقت  لتتطبخ ههههههههه

ومقاديره متوفرة دائماً ..

 

وهلأ ...

 

بلّشنا الطبخات المعتّة ويلي برأيي هَي من اختراع واحد فايئ ورايئ .. ومالوا لا شغلة ولا عملة ..

 

زايد عندو كم صنف من الخضرة وما عرف كيف بدّو يصرّفهن .. آم اخترعلن هل الأكلات ...

 

تفرّجوا ..

متل ..

 طباخ روحو : خليط من قطع الباذنجان والكوسا والبندورة والبصل وقطع اللحم والدهن مع حامض التمر هندي أو دبس الرمان

.
ستي زبئي : عدس مسلوق مع المعكرونة واللحم أو الزيت والكزبرة والثوم

 


منزله بأسود : باذنجان مقشر ومقلي يحشى باللحم المقلي مع البصل والصنوبر ويغطى بشرحات البندورة ويطهى

..
منزله بأحمر : قطع بندورة تطهى مع اللحمة المفرومة ويضاف إليها الكزبرة والتوم

 


منزلة الزهرة :زهرة مقلية مع اللحمة المفرومة والكزبرة وثوم والكمون، يقدم معها الليمون.

 

المنسفة بتشبه المنزلة بس الباذنجان ما بيكون مقلي وبيكون مفروم قطع صغيرة نسبياً ومع اللحمة والبصلة بيتنسف تنسيف، يعني بينطبخ بعرقه، طيب كتير مع مخلل الخيار والفليفلة

 

أبوبسطي : من اليقطين الأصفر مع اللحم والتمرهندي ورب البندورة

 
أبوشلهوب : كوسا مقطعة مطهوة مع البرغل واللحمة

 ...
داوود باشا : لحمة ناعمة كرات صغيبرة محشوة بالصنوبر تطهى بعد قليها مع
رب البندورة والبصل الجوانح ويحمض برب الرمان أو التمرهندي ...

شلباطو برز : قطع من الكرنب تقلى مع اللحمة ثم يضاف الرز وتطهى معا .


مألىالكرنب : قطع من الكرنب تطهى بالزيت ويضاف إليها الكزبرة والثوم


 
فـــولـــيــة : فول أخضر مطهو مع اللحم ويضاف إليه السلق والكزبرة والتوم
يخَــــنَا : محشي الملفوف بالرز
مفَرًكة فول : فول أخضر يطهى مع اللحم الناعم والسمن العربي ويضاف إليه مزيج البيض المخفوق .
مكمور الكوسا.. كوسا محشي لحمة مقلية وصنوبر وشوية رز، مقلي ومسقط بمرقة بندورة وبصل مقلي وبتتحمض بتمر هندي. بيتاكل جنبها رز وبدها بقدونس مفروم جنبها.. بتشهي

 

مكمور اليقطين.. تصنع من اليقطين الأصفر الكبير المقطع قطعاً صغيرة مقلية ثم يسلق ويوضع في مرق من الطحينة والجوز الناعم ودبس الرمان،



لك بيكفّي اسمهن .. والله عتبكن على يلي بيعرف المنسّفة من المنزّلة من المسأعة من المفرّكة

هههههههههههههههههههههههههههههههه

 

قسم المقبّلااااااااااااااااااااااااات

 

يم يم يم 

ويمكن نص أكلي وطلباتي من المطاعم منن مو من الطبخ

 

 

يلنجي.. أكلة زيت شامية طيبة كتير..
ما بعرف إذا كنتو تذكرتوه .. محشي ورق عنب وكوسا وباذنجان وفليفلة بالزيت، الحشو رز وبندورة وبصل ونعنع ..

 

وليييييييييييييي شو طيبة ... يمكن ما في مرّة فتت على مطعم إلا وكان أول شي بطلبو

 

سبانخ بزيت.. بصلة مقلية مع سبانخ، في ناس بيحطوا لها كزبرة وثوم بس أنا ما بحبها هيك، بس بصل مقلي وسبانخ، وع الوش قلوب جوز وبصل مقلي جوانح الدبور وحب رمان.

 

دبابة.. كبة نية بس بدل اللحمة لية وجوز وطبعاً مع البصل والبقدونس.

 


بابا غنوج : باذنجان مشوي مع الجوز المدقوق والتوم ويضاف إليهم البقدونس والفليفلة والبندورة المفرومة وعصير الرمان او الحامض .

 

 

سأط سهواً:


الفتوش.. وهو من الأكلات الشامية الشعبية المحبوبة جداً: خبز مقلي (بالأصل يصنع من الخبز اليابس) مع بصل وثوم وخيار وبقدونس ونعنع وبندورة وبقلة وخل وزيت وحبات من الزيتون الأسود  يم يم يم

 

التبولة معروفة طبعا وهل يخفى البقدونس والحمض والليمون الشرحات على وشّها

وهيّ عبارة عن  بقدونس ناعم وبرغل وبصلة ناعمة وبندورة ونعنع وليمون وزيت وتؤكل مع أوراق الخس أو أوراق الملفوف أو ورق العنب
سلطة البطاطا، بطاطا مسلوقة مع بصلة وبقدونس وحمض وزيت وهي حبيبة قلبي

 

 وأخصّيتن مع البيتزا .. يم يم يم


وهنن يمكن أهم شي بالسفرة لازم دائما يكونو موجودين

وأخصّيتن بالعزايم ..

 

وأعياد الميلاد .................

 


 محمرة.. جوز مدقوق بس مو كتير ناعم مع فليفلة حمرا حلوة وحدة مطحونة ودبس رمان وبصل ورشة كمون صغيرة وزيت. طيبة كتير أيام المكدوس.

 

 سلطة لبن بخيار : خيار ناعم يخلط مع اللبن والنعنع اليابس والتوم المدقوق .

 

سلطة الأنكنار، الأرضي شوكي، مثل سلطة البطاطا


متبل بيتنجان :باذنجان مشوي يطحن مع التوم ويضاف لبن وطحينة أو طحينة وحامض ويزين بالبقدونس والبندورة .

 

لبنية بالقشطة ....... ومعها كبة فستق او طابات فستق
 

أما أكلات الحلو بس من يلي بتتساوى بالبيت وأغلبها إذا مو كلّها من الحليب ..

 

 وهَيْنِة كتير وسريعة ..

 

في عنّا ..

 

توتية : من شراب التوت الشامي يطهى مع قليل من النشا .... بس لذيذة كتييييييييير وبنحط على وشّا جوز هند .. ما حدا بيساويها أطيب من أمي .. يم يم يم

 

هيلطية : حليب مطهوبدون سكر ويضاف اليه النشا والمستكه وعند تماسكه يقطع ويوضع في زبادي ويضاف اليه القطر ويزين الوجه باللوز والفستق الحلبي .

 

مهلبية.. حليب مطبوخ بالنشاء مع الماء زهر.

 

وعتبكن  إذا بعرف هَي من هَي .بس المهم إني ما باكل لا هي ولا هي ... بحس حالي متل البي بيه وأنا عم حرّكها بس  فما بالكن إذا أكلتها

 

صعي في شي اسمو حريرة كمانة هديك لب المشكلة  أكيد ...

كشك الفئرا : حليب مطهو مع السحلب ويزين باللوز المدقوق والفستق الحلبي


محلاية :حليب مطهو مع السحلب ويزين الوجه بالجوز المبشور ...

وما ألذّها من عند بكداش ...

 

نصيحة جربوها ...

 

رز بحليب.. معروفة طبعاً، لكن بالشام بيعملوا منه كمان شي اسمه (المرقد) وهو رز بحليب كانوا يتركوه يترقد على حرارة منخفضة ليصبح أسمك.. وأدسم..


حليب بفول أخضر.. تصوروا... حليب مطبوخ بالنشا طبعاً ومضاف إليه حبات الفول الصغيرة الطرية بعد سلقها وتقشيرها وقسمها إلى قسمين.


مبطنة ببردقان.. عصير البرتقال المطبوخ مع النشاء يوضع في زبدية حتى منتصفها وحين يجمد توضع فوقه طبقة من الرز بحليب.


وطبعاً الحبوب أكلة شهيرة بالشام وهي نوعان:

 

 حبوب بدبس وحبوب بسكر، تحتوي القمح والفول اليابس والفاصولياء اليابسة والحمص وتنكه بورق الليمون والمازهر ويرش فوقها مبروش جوز الهند وقلوب الجوز

 

حلاوة السميد، وهي عبارة عن سميد مطبوخ يمد في صواني وحين يبرد يجمد ويقطع مربعات..

 

اختراعات الله وكيلكن ... اسماع وشطّح ..


وهناك الكراوية وهي شهيرة لأنها تقدم في الشتاء وخاصة في مباركة الولادة، وهي مسحوق الكراوية مع مسحوق الأرز الناعم والسكر ويزين سطحها بكل أنواع القلوبات، جوز هند وجوز وفستق حلبي وبندق ولوز وصنوبر وكاجوووو.


وبيئولوا مفيدة كتيييييييييييييييييييييييير

 

وبيوصفوها للنفسا والعرسان ..

 

وبيمنعوّا عن الحامل أو المرضع

 

ههههههههههههههه

 

وبالنهاية بنئول متل ما  آلوا ..

 

شو ما طبخت العمشا ... جوزا بيتعشا ...

 

وإنت يا زلمة شو ما شفت أول منيح .. ونعمة كريم ..

ولا اتْنِئ كتير على مرتك .. وتسطلت على كم طبخة تعاجزها فيهن معاجزة ...

 

ولا تورجيّا شطارتك بنوب وتفوت على المطبخ آل شو بدك تطبخ لأنو ممكن تعميّا بدل ما تكحّلها ..

 

ما بتسمع بيلي بيئول ..

 

عطي الخباز خبزو ولو أكل نصو ...

 

وإذا كنت فلهوي بالطبخ فاشتغل من تم ساكت

 

هههههههههههه

 

وشوفي حبيبتي يا طبّاخة عصرك وزمانك

 

زوزك (زوجك) على ماعودتيه.. وابنك على ماربيتيه

 

ومتل ما بتطعميه بيتعوّد .. بس مو معناتى تئتصري على مفرّكة البطاطا بحيلة عم تشتغلي ومالك فاضية هه

 

كل شي لحال ...

 

سواء كنت  من يلي بياكلوا ولا ما بياكلوا

 

جوزك ما دخلوا بالفرمانات الجائرة في حق البشرية بما يتعلّق بالطبخ والكالوري والسمنة والدبدبة ..

 

سمعوا مين عم يحكي اسمعوا ..

هههههههههههههههه

 

بشوفكن بالمقال الجايي وأول حلقات السأسأة والخطوبة

 

لسّاتنا مع الكوساية

 

ومقال رقم ( 10 )

 

حبّوبتكن نوّارة الشام

(31) تعليقات


Add a Comment

اضيف في 11 ديسمبر, 2007 03:53 م , من قبل shouqnm
من فلسطين

بتعرفي قرأت مقالك وأنا بالشغل وما مصدقة أروح عالبيت حتى أتغدى وجعت كتيييييير لانه مبين الاكل زاكي
بشكرك كتير
مع تمنياتي بمزيد من التوفيق
شووووووق


اضيف في 11 ديسمبر, 2007 04:05 م , من قبل amoooooon
من فلسطين

نوارة الشام

استمتعت كثيرا برفقتك

برفقة طبخاتك المميزه

برفقة شفافيه روحك وجمال اسلوبك

برفقة لهجتك الرائعه جدا


غاليتي

دمتي بالف خير


اضيف في 11 ديسمبر, 2007 04:23 م , من قبل sham4me

غاليتي شوووووووق شكراً لمرورك ..

والله معك حق .. المقال بيخلي الواحد يجووووووووع غصب عنّو..

وأخصّيتن إذا كان صايم

صديقتك نوّارة الشام


اضيف في 11 ديسمبر, 2007 04:28 م , من قبل sham4me

شكراً أمووووووووون ..

على حضورك الميمون ..

وإنشالله دوم يكون ..

صديقتك نوّارة الشام


اضيف في 11 ديسمبر, 2007 04:28 م , من قبل sham4me

شكراً أمووووووووون ..

على حضورك الميمون ..

وإنشالله دوم يكون ..

صديقتك نوّارة الشام


اضيف في 11 ديسمبر, 2007 04:40 م , من قبل mashialhal
من سوريا

كلامك بيفتح النفس
وهلأ سوف اذهب علميدان
لاكل ممممممممم
بس الواضح انك طباخة ممتازة
و؟؟؟؟؟؟؟؟؟؟؟؟


اضيف في 11 ديسمبر, 2007 05:02 م , من قبل sham4me

شكراً أمووووووووون ..

على حضورك الميمون ..

وإنشالله دوم يكون ..

صديقتك نوّارة الشام


اضيف في 11 ديسمبر, 2007 05:06 م , من قبل sham4me

ما شي الحال .. ما حدا راح على المشفى ..

ولا حدا صار معو عسر هضم أو اضطر لغسيل معدة ..


ههههههههه

ويمكن هاد دليل إنو ماشي الحال بعرف اطبخ ..

هههههههههه

بس لا تسن سنانك لأني ما باكل إلا تفّاااااااااح

صديقتك الطبّاخة نوّارة الشام


اضيف في 11 ديسمبر, 2007 05:18 م , من قبل basha2009
من الأردن

يعني الشبعان خليتي يجوع
مشكورة نوارة الشام


اضيف في 11 ديسمبر, 2007 05:44 م , من قبل THeBuzzarD
من الأردن

والله حاولت اختار شي اكله اقول انها زاكية بس للاس فكلهم زاكين شو الحل كيف بدنا نوكلهم ..... ياترا في خدمة اكل بالمودنات... افرشو السفرة :-)


اضيف في 11 ديسمبر, 2007 07:02 م , من قبل buro
من مصر

هيك مابيصر شهيتيني على الاكل الشامي وانا هلا في مصر
شكرا كثير على الاكلات الحلووووة
ودمتي بخير
بس كدا عاوزين عزومة


اضيف في 11 ديسمبر, 2007 07:14 م , من قبل fleuredujasmin
من الجزائر

عزيزتي نور شـــــــــــــــام
تسلمي وتسلم مواضيعك الجميلة والتي نستمتع بهــــــــــــا حقـــــــا.
تقبلي مروري


اضيف في 11 ديسمبر, 2007 07:25 م , من قبل maysaa966
من سوريا

نوارة
الطريق الى قلب الرجل معدته
فكيف اذا كان عربيا شرقيا شاميا او غيره اصيلا
لا والله لن يقبل اقل من عشر طبخات من المحاشي الى السطات والمقبلات يوميا ما عدا الفاكهة والحلويات والموالح والقلوبات و المكسرات و المعجنات ما عدا القهوة والشاي والعصائر و السندويشات ما كان منها طازجا و ما بات و العصرونيات قبل العشاء
تكون عندهاالسيده حرمه من المباركات و سكان الجنات

يبعتلك الهنا نوارة نشفتي ريقي وانا عد اي ساعديني وهاتي شي بلعة تمر هندي افتراضية
دللي ضيوفك بالمدونة

دمت بود
ميساء


اضيف في 11 ديسمبر, 2007 08:42 م , من قبل mhdtayeb965

العين بعد فراقها الوطنا
لاساكنا الفت ولا سكنا


اضيف في 12 ديسمبر, 2007 02:35 ص , من قبل amego60
من سوريا

نوارة الشام ...تسلميلي شو شاطرة ...
خليتي بطني يهوش...ونسخت مقالتك لتتذكر مرتي هالأكلات....
ودمت بأناملك الي بتشهي....
............أحمد


اضيف في 12 ديسمبر, 2007 03:21 ص , من قبل hassanyahya

نوارة الشام
سلمت يدا يداك
وما ادري اتريدين اتروجين لمطعم تملكيه
لو اتريدين اتخلينها نفكر ببنات الشام
هههههههههههه
طبعا فخر واحد يرتبط بشامية
تقبلي مروري
اخوك
حسن يحيى العذاري


اضيف في 12 ديسمبر, 2007 11:21 م , من قبل rawad81
من المملكة العربية السعودية

كيفك يا أمر لك هالمواضيع هي راح ترجعنا عالشام وانضل هنيك بلا سفر بلا بطيخ
الف سلام الك ولاالشام.......


اضيف في 17 ديسمبر, 2007 08:43 م , من قبل إياد

الغالية نووووووور
إذا كان البدر لا يُفتقد إلا في الليلة الظلماء؛ فالنور غدا يُفتقد في كل حين
ومنذ ستة أيام بنهاراتها ولياليها وساعاتها وثوانيها لا نور في هذه الحياة
فمتى يعود؟
سؤال أصبح في مجاهل الغياب
سؤال صار أقسى منه الجواب
لأنه رغم كل النداءات
لا جواب
نداءات واستغاثات هناك هناك هناك
وأخيرا ها هي هنا
ولا جواب يلبي النداء
المدونة تستغيث صاحبتها
فمنذ ستة أيام دون طعام أو شراب
والكوساية لم تنضج بعد
فعلى أي شيء نقتات؟
سيُسجل التاريخ أن الجيران منذ الحادي عشر من كانون الأول لم يتناولوا طعامهم
بعدما عودنا النور على المأكولات الشامية الشهية
نوووووووووووووور الغالية
أذكرك بجواب الأعرابي الذي سُئل: كيف أنت وقصعة من ثريد، فقال: آكلها وأقول هل من مزيد؟
تعودنا على مأكولاتك وحلوياتك حتى أصبحنا نهمين، فأكلنا ما أتيت به ونريد المزيد، وها هو العيد أقبل علينا يجر ثوبه مختالا فماذا حضّرت لنا من حلوى لهذا اليوم المبارك؟
لن أقول إني في انتظار الحلوى، بل في انتظار ما هو أغلى وأعذب، لأن العيد بلا نور ليس بعيد،
كل عام والنور بخير
طمئنينا فالقلب بات مضطربا


اضيف في 18 ديسمبر, 2007 05:42 ص , من قبل sham4me

شكراً ياباشا ..

وشوف يلي بعدو بنور بتتباهى ..

صديقتك نوّارة الشام


اضيف في 18 ديسمبر, 2007 05:47 ص , من قبل sham4me

أهلين بأنوسة ..

والله وزمان هالأمر ما بان ..

بوشّك يا تقبر ... عمقال العيد ..

ليصير مالك حيران ..

معك رفيقتك .. نوّارة الشام


اضيف في 18 ديسمبر, 2007 05:48 ص , من قبل sham4me

لعيونك خيّو أحلى عزيمة أميركية ..

ولو ..

ههههههه

شكراً لمرورك .. بشوفك بيلي بعدو ..

صديقتك نوّارة الشام ..


اضيف في 18 ديسمبر, 2007 05:49 ص , من قبل sham4me

صديقتي أسعد الله أوقاتك دوم ..

وأتشرفك بحضورك كل يوم ..

صديقة نوّارة الكون ..

نور الشام


اضيف في 18 ديسمبر, 2007 05:51 ص , من قبل sham4me

صديقتي ميسو ..

صدقت والله إنو معدة الرّجّال مفتاحو بس

ياترى ليش ..

شكراً لمرورك .. وأراك بيلي بعده ..

صديقتك دوم .. نوّارة الكون


اضيف في 18 ديسمبر, 2007 05:53 ص , من قبل sham4me

يا طيب يا غالي ..

فيك احتار موّالي ..

مالك شايف مقالي ..

عن الأكل والله ..

مو عن حالي ..

بس يلى على كلّن ..

مشكور يا أغلى الغوالي


اضيف في 18 ديسمبر, 2007 05:56 ص , من قبل sham4me

شكراً خيّو أحمد لأنك نسخت المقال ..

هيك حكون مرتاح البال ...

إنو أكلك شامي .. وعال العال ..

ولنوّارتك الشامية الدعاء ..

مافي كلام ..


اضيف في 18 ديسمبر, 2007 05:58 ص , من قبل sham4me

صديقي حسن .. أكيد إلو الفخر يلي بدو يرتبط بشامية ..

لأنو متل ما بيقولوا بيعيش عيشه هنية ..

وبياكل أكلة مريّة ..

يعني لذيذة .. وسهلة الهضم ..

ههههههههه

شكراً لمرورك .. أراك بيلي بعده


اضيف في 18 ديسمبر, 2007 06:01 ص , من قبل sham4me

وهلأ رواااااااااااااد ..

الأمر بيسلّم عليك .. وبيقلّك بوشّك لهنيك ..

شكراً لمرورك ..

صديقتك نوّارة الشام


اضيف في 18 ديسمبر, 2007 06:04 ص , من قبل sham4me

صديقي وصاحبي ونور مهجتي وغاليي إياد ..

فاجأني مقالك فقلّما أراك هنا ..

ولكن حقك علي .. فالغياب له مبرر تراه في مقالٍ تالٍ ..

أرجو أن تغفر محبتك لي .. وأن يغفر جيراني تأخري ..

شكراً لمرورك بمدونتي المتواضعة ..

ويسعدني أن تتشرف بأمثالك ..

شكراً لك ..

صديقتك .. نوّارة الشام


اضيف في 18 ديسمبر, 2007 06:05 ص , من قبل sham4me

صديقي وصاحبي ونور مهجتي وغاليي إياد ..

فاجأني مقالك فقلّما أراك هنا ..

ولكن حقك علي .. فالغياب له مبرر تراه في مقالٍ تالٍ ..

أرجو أن تغفر محبتك لي .. وأن يغفر جيراني تأخري ..

شكراً لمرورك بمدونتي المتواضعة ..

ويسعدني أن تتشرف بأمثالك ..

شكراً لك ..

صديقتك .. نوّارة الشام


اضيف في 09 ديسمبر, 2008 09:31 م , من قبل عمار عائدي
من سويسرا

نوارة الشام
يعني كلمة شكرا قليلة كتير كتير
صرلي مدة وأنا عم دور على معظم الأكلات
وبكرة رح بلش فيهون تكرم عينك والله
ثمن الغربة صعب كتير منها الحرمان من هيك أكل بس لا تخافي منا كول لمى منيجي على الشام تقبر قلبي الشام وأهلها


اضيف في 27 نوفمبر, 2009 03:37 ص , من قبل Anasourie
من الولايات المتحدة

I was looking for Syrian recipes online and came across your blog. Thank you for reminding me of all these delicious dishes. Cheers.




Add a Comment

<<Home


.
.